Principal’s Address2019-11-07T11:34:09+00:00

მოგესალმებით ყველას, ვინც ჩვენი სკოლის ვებგვერდით დაინტერესდით.

ჩვენი სკოლა ოცდამეერთე საუკუნის დასაწყისში დაარსდა და მიზნად ახალი საუკუნის მოქალაქის აღზრდას ისახავს.

აღზრდა კულტურისა და ცოდნის გადაცემის რთული და ხანგრძლივი პროცესია. ეს პროცესი  საინტერესო და სახალისო რომ იყოს, ჩვენი სასწავლო პროგრამა დამატებითი საგნებითა და მრავალფეროვანი აქტივობებითაა გამდიდრებული. 

თანამედროვე სამყაროში ახალგაზრდის უკეთ ინტეგრაციისთვის უმნიშვნელოვანესია უცხოური ენების შესწავლა და სხვადასხვა ქვეყნის კულტურასთან ზიარება. ამ მიზნით, სკოლის კურიკულუმი რამდენიმე უცხოური ენის შესწავლას ითვალისწინებს საერთაშორისო სერტიფიცირების შესაბამისად. სწავლების პროცესში მუდმივად ვიყენებთ თანამედროვე ტექნოლოგიებს: ჩვენი მოსწავლეები უკვე რამდენიმე წელია, საბუნებისმეტყველო მეცნიერებების საფუძვლებს ვირტუალური ლაბორატორიის დახმარებით ეუფლებიან. ამავე მიზანს ემსახურება საგაკვეთილო პროცესში გასვლითი გაკვეთილების, შემეცნებითი ვიზიტების და სხვა ტიპის აქტივობების ჩართვა.

მოსწავლეთა თვითმმართველობის არჩევითი ორგანოს სკოლის ცხოვრებაში აქტიურად ჩართულობა, ასევე,  სწავლის მიმართ მოტივაციის ამაღლებას ემსახურება. მოზარდები ყოველწლიურად არაერთ ღონისძიებას და აქტივობას ახორციელებენ, რომლებსაც საკუთარი ინტერესებისა და საჭიროებების გათვალისწინებით თავადვე გეგმავენ: გარემოს დაცვითი პროექტები, სხვადასხვა ტიპის საქველმოქმედო ღონისძიებები, ინტელექტუალური თამაშები და კონკურსები, შეხვედრები წარმატებულ და საინტერესო ადამიანებთან.

სკოლაში შექმნილი გარემო თითოეული მოზარდის შესაძლებლობების მაქსიმალურად გამოვლენას და რეალიზებას ისახავს მიზნად. ვფიქრობ, რომ მხოლოდ თვითდამკვიდრებულ და მოაზროვნე ადამიანებს შეუძლიათ თავისუფალი და ძლიერი საზოგადოების შექმნა; საზოგადოების, რომელშიც ადამიანების პატივისცემა, გულისხმიერება, თავმდაბლობა, სამართლიანობა, ოჯახისა და ქვეყნის მიმართ სიყვარული მთავარი ღირებულებებია.

გისურვებთ წარმატებებს!

პატივისცემით,

მარიამ ქუთათელაძე