ხელოვნება

I-VI კლასები

ხელოვნების უნივერსალური ენის შესწავლა ხელს უწყობს ადამიანში მშვენიერების განცდის, წარმოსახვის უნარის, შემოქმედებითი აზროვნების განვითარებას, აძლევს თვითგამოხატვის საუკეთესო საშუალებას, ეხმარება სამყაროს ერთიანობისა და, ამავდროულად, მრალვლფეროვნების შეცნობაში. ხელოვნებისადმი სიყვარულისა და ინტერესის გაღვივება, ხელოვნების ნიმუშების აღქმის უნარის ჩამოყალიბება ამ საგნის სწავლების ძირითად მიზანს წარმოადგენს. მნიშვნელოვანია მოსწავლეების ეროვნულ და მსოფლიო კულტურულ ფასეულობებთან ზიარება, ხელოვნების დამფასებლებისა და კულტურული მემკვიდრეობის დამცველთა აღზრდა.

დაწყებით საფეხურზე ხელოვნების სწავლება ითვალისწინებს პრაქტიკულ–შემოქმედებით საქმიანობას: ხატვას, ძერწვას, აპლიკაციების და კოლაჟების დამზადებას. მოსწავლეთა ინდივიდუალური შესაძლებლობების გამოვლენას, მათი  შემოქმედებითი აზროვნების წახალისებას უმთავრესი ყურადღება ექცევა. პირველი კლასიდან იწყება ისეთი თეორიული საკითხების შესწავლა, როგორიცაა ფერი, ხაზი, ფორმა და სივრცე. მოსწავლეებს უვითარდებათ დაკვირების, აღწერის, საკუთარი და მეგობრების ნამუშევრების შეფასების უნარი.

სისტემატურად ეწყობა საკლასო და სასკოლო თემატური გამოფენები.