დირექტორის მიმართვა

MariamKutateladzeმოგესალმებით ყველას, ვინც ჩვენი სკოლის ვებგვერდით დაინტერესდით.

ჩვენი სკოლა ოცდამეერთე საუკუნის დასაწყისში დაარსდა და მიზნად ახალი, ოცდამეერთე საუკუნის ადამიანის აღზრდა დაისახა.

აღზრდა კულტურისა და ცოდნის გადაცემის რთული და ხანგრძლივი პროცესია. ეს პროცესი რომ საინტერესო და სახალისო გავხადოთ, ჩვენი სასწავლო პროგრამა დამატებითი საგნებითა და ისეთი მრავალფეროვანი აქტივობებითაა გამდიდრებული, როგორებიცაა: სამეცნიერო და სასწავლო კონფერენციები, თეატრალიზებული პროექტები, გასვლითი გაკვეთილები, შემეცნებითი ვიზიტები.

თანამედროვე სამყაროში ახალგაზრდის უკეთ ინტეგრაციისთვის, უცხოური ენების ცოდნა ძალიან მნიშვნელოვანია. ამიტომ, სკოლის კურიკულუმი რამდენიმე უცხოური ენის შესწავლას ითვალისწინებს საერთაშორისო სერტიფიცირების შესაბამისად.

სწავლების პროცესში მუდმივად ვიყენებთ თანამედროვე ტექნოლოგიებს, კერძოდ, ჩვენი მოსწავლეები საბუნებისმეტყველო მეცნიერებების საფუძვლებს ვირტუალური ლაბორატორიის დახმარებით ეუფლებიან.

მოსწავლეთა თვითმართველობა აქტიურადაა ჩართული სკოლის ცხოვრებაში. მოსწავლეების ინტერესებისა და საჭიროებების გათვალისწინებით, ყოველწლიურად იგეგმება საქველმოქმედო ღონისძიებები, გარემოს დაცვითი პროექტები, ინტელექტუალური თამაშები და კონკურსები, შეხვედრები წარმატებულ და საინტერესო ადამიანებთან.

ამ და ბევრ სხვა, თქვენთვის საინტერესო ინფორმაციას  ჩვენი ვებგვერდის მეშვეობით შეგიძლიათ გაეცნოთ.

სკოლაში შექმნილი გარემო თითოეული მოზარდის შესაძლებლობების მაქსიმალურად გამოვლენას და რეალიზებას ისახავს მიზნად. ვფიქრობთ, რომ მხოლოდ რეალიზებულ, მოაზროვნე და თვითდამკვიდრებულ ადამიანებს შეუძლიათ თავისუფალი და ძლიერი საზოგადოების შექმნა. ისეთი საზოგადოების, რომელშიც ურთიერთპატივისცემა, გულისხმიერება, თავმდაბლობა, სამართლიანობა, ოჯახისა და ქვეყნის მიმართ სიყვარული და პასუხისმგებლობა მთავარი ღირებულებებია.

გისურვებთ წარმატებებს!